Во погоните на фабриката „Литекс моторс“ во соработка со кинеската компанија „Грејт вол“ во бугарскиот град Ловеч е произведен првиот бугарски патнички автомобил.
Менаџерот на „Литекс моторс“, Кирил Георгиев изјави дека првиот мотниран автомобил е од марката „Грејт вол волекс Ц10“, а оти сериското производство во фабриката ќе почне во почетокот на наредната година. Тогаш официјално ќе биде отворена фабриката во која ќе работат 2.000 луѓе.
- Компанијата поради големото интересирање веќе разви дилерска мрежа и отвори претставништва во две балкански земји, рече тој.
Во „Литекс моторс“ ќе се произведуваат три модели на патнички автомобили, вклучувајќи џип и пикап, кои според најавите на компаниите ќе бидат евтини и поквалитетни. Џипот со „фул“ опрема веќе се рекламира по цена нешто поголема од 12.000 евра.
Сопственикот на фабриката „Литекс моторс“ е бизнисменот и сопственик на фудбалскиот клуб „Литекс“ Гриша Ганчев, кој поседува 92 отсто од акциите, додека остатокот припаѓа на Корпоративната трговска банка.
Неодамна од „Литекс моторс“ е најавено и производство на електромобили, кои во соработка со компанијата „Грејт вол“ ќе почне на пролет наредната година.
Следете за нови коментари на RSS
