Денеска во 16,15 часот македонските ракометари ќе го одиграат натпреварот против полската репрезентација на Европското првенство што се игра во Белград.
По несреќниот пораз против Данска, ракометарите се подготвуваат за победа над Полска, која до сега се покажа како силна селекција.
Селекторот на репрезентацијата на Полска, Богдан Вента, вели дека денешниот натпревар против Македонија за нив е финале пред финалето, дуел што ќе реши многу работи.
“Добро знаеме со кого играме, Македонија несомнено има квалитетна селекција предводена од Кирил Лазаров. Но, мислам дека ние треба да го извлечеме најдоброто од себе. Треба да одиграме како во второто полувреме против Шведска и мислам дека со таков пристап нема да имаме проблеми. Толкави осцилации во играта се едноставно недозволиви“, вели Вента.
Македонската репрезентација во саботата претрпе пораз од Данска, со само еден гол разлика. Претходно, нашите ракометари убедливо ја победија репрезентацијата на Чешка со 27 - 21.
Следен предизвик на црвено-жолтите е домаќинот Србија.
Следете за нови коментари на RSS
