Ме-Читаш

Актуелниот шампион во Формула 1 Себастијан Фетел (Ред Бул) се наоѓа на само еден бод до одбрана на тронот, откако славеше на трката за ГН на Сингапур на патеката „Марина беј“.

Деветтата победа во 14. трка сезонава германскиот ас ја обезбеди пред Џенсон Батон, а токму британскиот пилот на Мекларен со освоеното второ место не му дозволи на Фетел да стане уште денеска најмладиот двократен шампион во историјата на Формула 1. Победничкиот подиум го комплетираше тимскиот колега на Фетел, Австралиецот Марк Вебер.
Фетел доминираше во целиот тек на единствената ноќна трка на Ф1 календарот, не дозволувајќи во ниту еден момент да биде загрозен.

Предноста на Германецот се стопи со излегувањето на безбедносното возило во 30-от од 61. круг од трката, откако Михаел Шумахер (Мерцедес) спектакуларно излета по колизијата со Серхио Перез (Заубер), но за среќа ветеранот мина без никакви повреди.

Во Сингапур свој препознатлив настап повторно имаше Луис Хамилтон, кој никако да престане да предизвикува инциденти и да добива санкции. За дуелот со Фелипе Маса (Ферари), Британецот освен што го извлече подебелиот крај, доби и временска казна, но пилотот на Мекларен сепак на крајот, по одличното возење, успеа да освои поени завршувајќи како петти, зад Фернандо Алонсо (Ферари).

Британецот Пол ди Реста (Форс Индија) го освои шестото место, што претставува најдобар резултат во неговата дебитантска сезона во Формула 1, а бодови во Сингапур освоија уште и Нико Розберг (Мерцедес), Адриан Сутил (Форс Индија), Фелипе Маса (Ферари) и Серхио Перез (Заубер).

Следната трка се вози на патеката Сузука за ГН на Јапонија на 9. октомври, која најверојатно Фетел ќе биде промовиран како старо-нов шампион во Формула 1.

Во поредокот на возачи во убедливо водство е Фетел со 309 поени, пред Батон (185), Алонсо (184) и Вебер со 182 бода. Кај конструкторите недопирлив е Ред Бул со 491 бод, пред Мекларен (353) и Ферари (268).

Резултати:

 1.  Vettel        Red Bull-Renault           1h59:06.537
 2.  Button        McLaren-Mercedes           +     1.737
 3.  Webber        Red Bull-Renault           +    29.279
 4.  Alonso        Ferrari                    +    55.449
 5.  Hamilton      McLaren-Mercedes           +  1:07.766
 6.  Di Resta      Force India-Mercedes       +  1:51.067
 7.  Rosberg       Mercedes                   +     1 lap
 8.  Sutil         Force India-Mercedes       +     1 lap
 9.  Massa         Ferrari                    +     1 lap
10.  Perez         Sauber-Ferrari             +     1 lap
11.  Maldonado     Williams-Cosworth          +     1 lap
12.  Buemi         Toro Rosso-Ferrari         +     1 lap
13.  Barrichello   Williams-Cosworth          +     1 lap
14.  Kobayashi     Sauber-Ferrari             +    2 laps
15.  Senna         Renault                    +    2 laps
16.  Kovalainen    Lotus-Renault              +    2 laps
17.  Petrov        Renault                    +    2 laps
18.  D'Ambrosio    Virgin-Cosworth            +    2 laps
19.  Ricciardo     HRT-Cosworth               +    4 laps
20.  Liuzzi        HRT-Cosworth               +    4 laps
21.  Alguersuari   Toro Rosso-Ferrari         +    5 laps